Son Montse Paz e nacín en Redondela en 1962. Debo meu nome ao feito de que meu pai traballara daquela nun barco da Trasatlántica chamado Montserrat. Trasladámonos a vivir a Vigo cando eu tiña 8 anos e dende entón vivín case sempre aquí.
Estudei Filoloxía inglesa en Santiago de Compostela e ao rematar aprobei as oposicións de secundaria.
Vivín en Panxón e traballei nas Escolas Proval. Tiven o meu primeiro destino definitivo en Bande (Ourense) e alí descubrín un país diferente ao que eu coñecía. Aprendín moito profesional e persoalmente e fun moi feliz. Despois desa etapa volvín a Nigrán e logo ao Instituto Politécnico de Vigo onde adquirín a condición de catedrática e formei parte do primeiro equipo directivo dun centro de 160 docentes no que a Xefatura de Estudos e a dirección eran asumidas por mulleres. Alí pasei a maior parte da miña vida profesional como docente até o pasado mes de xullo.
Durante uns poucos anos compaxinei a docencia con algúns traballos de tradución do inglés para o galego.
Dende os trece anos adoito visitar a miña familia inglesa en North Yorkshire, o que espertou o meu interese pola cultura e vida das illas.
Gústame moito viaxar, ler, calcetar e o fútbol (na ledicia son celeste, celtista no padecer)
Teño unha filla que é xornalista e na actualidade vivo en Vigo co meu compañeiro con que comparto tamén lecturas e días de fútbol.
Son feminista. Formei parte da comisión promotora da 1ª Iniciativa Lexislativa Popular presentado no parlamento galego a prol da unidade baixo o lema “Nós Mesmas” no ano 1989.
Comentarios
Publicar un comentario